A New Home: كمل تشطيب بيتك الجزء الاول - سطح المنزل

A New Home: كمل تشطيب بيتك الجزء الاول - سطح المنزل: اللي انت هتقراه هو مجرد معلومات متجمعه عشان تسهل عليك ترتيب افكارك و انت بتكمل تشطيب بيتك... عايز تشطب بيتك الجديد انصحك تجيب مهندس دي...

كمل تشطيب بيتك الجزء الاول - سطح المنزل

اللي انت هتقراه هو مجرد معلومات متجمعه عشان تسهل عليك ترتيب افكارك و انت بتكمل تشطيب بيتك...

عايز تشطب بيتك الجديد انصحك تجيب مهندس ديكور...

عايز تكمل باقي تشطيب بيتك انصحك تقرا المقال...

فلو حد عنده اي استفسارات فانا هنا هرد عليها كلها و كمان هبعتلكم أفكار و هقولكم علي الأماكن اللي تجيبوا منها كل حاجه و علي اد ما هقدر هساعد بالافكار و النصائح و الأماكن و الأسعار...

سطح المنزل "الروف"

افكار الروف كتير اهم حاجه لازم تكون مقرر من الاول انك مش هتبني تاني فوقيه و في حاله ان خلاص مفيش تعليه تاني لازم عزل حراري و مائي.
ممكن يتم تقسيم الروف لمناطق؛ منطقه االبرجولا*، منطقه الشوي، منطقه Spa، او ممكن قاعده عربي.

الارضيات
١- لو في اطفال و هيلعبوا بعجل او حاجه يبقي منطقه اللعب تتشطب بال Heavy Duty وبيبقي سمكه كبير و معالج بطريقه انه يستحمل الاوزان؛ في منه بسعر كويس في سيراميكا رويال.

بلاطات Heavy Duty

٢- و في خامه كويسه اسمها الترتان تنفع للجراج و الملاعب و الاسطح؛ شبه بالضبط ارضيات ملاعب الباسكيت.

ارضيات ترتان

٣- اما بقي محبي الديكورات فمثلا لمنطقه الشوي في بلاطات يدوي بتتباع في البساتين باشكال و الوان جميله تديكوا ال Style المغربي و في شركه اسمها النيل بتبيعه بجوده عاليه جدا بس سعره اعلي.

البلاط اليدوي

٤- و الي محبي الخشب فهتدفعوا كتير 💥💥 علشان النوع الامثل في السطح هو الخشب ال Teak بس دا للاسف في منه انواع كتير في السوق رديئه و الانواع الجيده منها غاليه جدا.

Teak خشب

٥- و اخيرا ممكن نضيف اللون الاخضر بالنجيله الصناعي و بردو في منها بجوده عاليه و في منها رديئ و سعرها بيبقي حسب ارتفاعها.

نجيله صناعي

الاضائه
يستحب ان الاضائه تبقي غير مباشره  و تعتمد علي الابليك و الكشافات الارضيه و الحائطيه الا في الاماكن اللي ليها سقف زي البرجولا مثلا.

الاضائه الغير مباشره

الديكورات و الاقمشه و الاكسسوارات
لو عايزين الروف يفرق معاكوا انصح بالستائر للبرجولا او السور البغدادلي و كمان الاقمشه زات الالوان الزاهيه و النباتات مهمه جدا لانها هتضيف حياه للمكان.

البغدادلي Strips

الستائر و البرجولا و الالوان الاقمشه

لو حابين المكان يكون زي ملاذ للاستجمام انصح بعدم عمل مكان للتليفزيون بس دا طبعا مش كل الناس تقدر عليه 😄

الخدمات
يفضل كمان يبقي في حمام و مطبخ بسيط و مصغر ب Counter او منغير مكون من وحده واحده فقط من الخشب المقاوم للشمس يعني kettle و اكواب و ممكن Microwave و خلافه...الخ.

النافوره
النوافير و الستائر المائيه في منها نوعين نوع يحتاج مصدر مياه و صرف و دا بيتنضف كل فتره طويله بس استهلاكه و تكلفته عاليه و في اللي المياه فيه بدوره مستمره يعني تملوها مياه و المطور يدورها بس دي محتاجه تنظيف مستمر و تكلفتها اقل بس طبعا النوافير حسب حجمعا لازم نتاكد من عزل المكان تحتها كويس.
و ممكن نشتريها من حته اسمها منطقه الفخارين عند مقياس النيل جمب سور مجري العيون بس فاصلوا كويس.
و دي طريقه لعمل النوافير للي عايز يعمل نافوره بسيطه بنفسه في البيت.

طريقه عمل النافوره**

طريقه عمل النافوره**

ياريت تحافظوا علي المساحات الواسعه و يا ريت دي تبقي قاعده عامه في كل ماكن في البيت صدقوني الفرش الكتير ملوش لازمه.

**لو عايزين تعرفوا طريقه عمل النافوره بالتفصيل و حاجات تانيه كتير استنوني في ال Blog الجي....👀
*لو عايزين تعرفوا انواع البرجولات استنوني في ال Blog الجي....👀

اعمل follow علشان تتابع ال Blog

هبه سمير
مصممه ديكور

Heba Samir

Interior Designer

Phone:        010 212 66 111

E-mail:       Riciclatoegypt@gmail.com

Instagram:  Riciclato